185. හඳ දන්නවනම් ?

පුංචි කාලෙ හැමදාමත් අහස පුරාවට හිටියා

ගිය ගිය තැන හඳහාවා රෑ මගෙ පස්සෙන් ආවා

පහ වසරෙදි ශිෂ්‍යත්වෙට වාඩි කරන් මං ගාවා

කන්ද උඩින් පායපු හැටි රචනාවට මං ලිව්වා

සා. පෙ. ලියන්නට කලියෙන් පෝයට පන්සල් ආවා

වෙහෙර වටේ අපි වඳිද්දි ඔයා වෙහෙර උඩ හිටියා

උ. පෙළ පාඩම් කරද්දි ජනේලෙ අයිනෙන් පායා

අපි පාඩම් කරපු ඒව ඔක්කොම අහගෙන හිටියා

කැම්පස් තේරිලා ඉද්දි තව ලස්සන වී පෙනුනා

ඔහේ බලන් ඔය දිහාව මං නිසදැස් කවි ලීවා

හදිස්සියෙන් මගෙ ලෝකෙට තව හඳ හාවෙක් ආවා

ඔයා වගේමයි එයැයිත් නොදැක ඉන්න බැරි වූවා

ගෙවල් දෙකක අපි දෙන්නම එක වෙලාවෙ හඳ බැලුවා

එයැයි මෙමට හාවා වෙලා මම එයැයිට හාවී උනා

සිනා කතා සරදම් මැද අපි මහ හුඟ දුරක් ගියා

කියන්න ඕනත් නෑ තව දැක්කනෙ හැමදේම ඔයා

හාවා සමු අරන් ගිහින් හද ආවාටයක් උනා

අහස මැද්දෙ හිටිය ඔයත් වළාකුලකට වැහිලා ගියා

හැමදාමත් හඳ බැලිල්ල නොදනිම මග ඇරිලා ගියා

අහම්බෙකින් දැක්කත් හාවෙක් නැති බව මතක් උනා

කොතැනකවත් දොස් දකින්න ඒත් හිතට බැරිව ගියා

භූ ලක්ෂණ අපෙත් වෙනස් ඒ ගානක් නැතුව ගියා

උප ග්‍රහයෙක් වුවත් ලොවක් ඇස් අද්දර ගෙනත් තියා

සොළොස් කළාවම හාවා යනකොට මට දීල ගියා!