මල් මල් මල් සිනා ගෙනෙන - රන් වන් රන් උදෑසනේ
වාසනාව චූටි පැංචිගේ - ගේ පුරාම විසිරිලා තියේ ...
තාත්තටත් කාසි පනම් - වැඩි වැඩියෙන් ලැබෙනවාලු
යන එන තැන ගමන බිමන - සුබ අතටම හැරෙනවාලු ...
අම්මට නම් මුළු ලෝකෙම - ලස්සන වී පෙනෙනවාලු
කොහේ ගියත් මොනව කරත් - දූගෙ සුවඳ දැනෙනවාලු ...
ආච්චි අම්මගෙත් හිතට - සනීපයක් දැනෙනවාලු
පුංචි පැංචිගේ හිනාව - දැක්කම ලෙඩ මැකෙනවාලු ...
සීයට නම් කණ්නාඩිත් - නැතුවම ඇස් පෙනෙනවාලු
එයත් තාම චූටි බබෙක් - වගේ කියල හිතෙනවාලු ...
පුංචිට නම් හිත පිරෙන්න - ගොඩක් කෝල් ලැබෙනවාලු
මල් කඩ කඩ මුළු දවසම - මල් වත්තෙම ගෙවෙනවාලු ...
සීනු පැටියගේ පුරු පුරු - දැන් වැඩියෙන් ඇහෙනවාලු
දවස තිස්සෙ ලඟට වෙලා - ඉඳගෙන තනි රකිනවාලු ...
ඔක්කොටම සැර දමන්න - චූටි බබෙක් ඉන්නවාලු
වාද බේද නෑ කවුරුත් - එයට හිස නමනවාලු ...