හිටි ගමන් චැට් එකේ ඩොට් තුනක් එවන එක
ඊට පසු විරිත්තා ‘නෑ නිකන්’ කියන එක
එහෙම දවසට රෑට හීනෙනුත් පේන එක
මට පුදුම අපෙ පිස්සු තාම හොඳ නූන එක
එක නගරෙ අත දුරින් අපි දෙන්න ඉන්න එක
ඒ උනත් හමුවෙලා මොකටදැයි සිතෙන එක
ඉබේ දකිතැයි සිතා ලස්සනට අඳින එක
මට පුදුම අපිට අපි තාම හමු නූන එක
හිමකිරම දුටු මතින් සිනාවක් නැගෙන එක
ක්ලැරන්ස්ගේ සින්දු ටික විතරක්ම අහන එක
හැමදාම දොයියන්න කලින් හඳ බලන එක
මට පුදුම අපෙ මතක තාම නැති නූන එක
වැස්ස දවසට උදේ කළු කෝපි හදන එක
බොන ගමන් කාගෙහරි කවි පොතක් බලන එක
මේසෙ උඩ අරලියා මලක් නොවරදින එක
මට පුදුම කිසි දෙයක් තව වෙනස් නූන එක
ඉඳහිටෙක මල් අතර ඔය මූණ පෙනෙන එක
දුර ඉන්න තරු රෑට එක ළඟින් දිලෙන එක
මතක් වී විදුලියක් හිත මැදින් කෙටෙන එක
මට පුදුම අපි අපෙන් තාම වෙන් නූන එක!
(පින්තුරය අන්තර්ජාලයෙනි.)