218. වැලන්ටයින් තෑග්ග

එකට මහ වැහි හතක් වැස්සත් කුඩේ අමතක වෙනවය 

අව්වෙ යනකොට අදාලම නෑ පිච්චි පිච්චී යනවය  

දිග ගවුම්, හැඩ සාය හැට්ටද ලෝකෙ දරුණුම විහිළුය 

කොහි යතත් නිල ඇඳුම නම් ටී ෂර්ට් එක සහ ඩෙනිමය 

දැක්ක විට අඩි උස සපත්තූ කලන්තෙට වගෙ එනවය 

ස්ලිපර්ස් දෙකකින් ඉතා සරලව කකුල් දෙක තුටු වෙනවය 

කැට් වොර්ක් යන අංගනාවියො දැකල හිත උණු වෙනවය 

අඩි දෙකට පහු කරල වේගෙන් ගමන දුවගෙන යනවය 

කොන්ඩ දිග දස අතේ විහිදුන මෝස්‌තර නෙක අපලය 

කොටට කැපුවම හුළං වැදි වැදි බෙල්ල වුව සැනසෙනවය 

ඕන කඩ චෝරුවක් ගිලිනට කොයි වෙලෙත් කට කැමතිය 

දසන් පෙනුනට මොකක් වෙනවද කැකිරි පැළුනම නියමය  

බෑග් දෙක තුන මල විකාරය හිතෙද්දිත් ටැපලෙනවය 

එකම බැක් පැක් එකට සේරම කොහොමහරි පැටවෙනවය 

ඒක පිට මැද එල්ල ගත් විට දෑත නිදහස් වෙනවය 

හිතේ හැටියට පද්ද පද්දා ඕන ගමනක් යනවය 

උපදවා බැති ප්‍රේම බොරු ගුණ ගායනා නොකරනවය 

අසාධාරණෙ පේන්නට බෑ ඉබේටම නැගිටෙනවය 

හිතේ හංගන් දෙයක් ලතැවෙන පුරුද්දක් හෙම නැතිමය 

මූණටම අත ඇරලා දැම්මම ඒක එතනින් ඉවරය 

මූඩ් එකපිට මාරු වීමෙන් නිතර හොල්මන් වෙනවය 

විහිළු කරනා අයවලුන් හට විසේසෙන් තැන දෙනවය 

සිංදු පිස්සන් වෙත කලාබර බලෙන් ගොස් ඇමිණෙනවය  

සතුන්ගේ නම් නිතර දෙවෙලේ භාවිතාවට එනවය 

රාස්ස ගණ යැයි කෙන්දරයේත් කියා තියෙනව මතකය 

එහෙව් රාස්සිගෙ විමන වෙත වැඩි දෙවියො වේ නම් පුදුමය 

වැලන්ටයිනුත් ඇවිත් ගොස් ඇත තෑගි සුපැතුම් අකැපය 

විහින් වැටුනට අමාරුවෙ මේ කවිය දෙවියනි ඔබටය!