පාට පාට කඩදහි ඔරු ගොඩාරියක් හදන්
මිදුලෙ වතුර පිරුන පසුව පා කරන්න හිතන්
ඉන්නේ මග බලන් බබෙක් ගොඩක් දවස් ඉඳන්
වළාකුලේ එන්නෙ නැද්ද වැස්සක් මෙහෙ අරන්
උපන් දිනේ දවසට කහ මල් පිපෙන්න කියා
දාස් පාත්තියක් හදල ආච්චම්ම ගියා
මිලින වෙලා ඒ ඔක්කොම වැස්ස ඕන කියා
උපන්දිනේ පහුවුනාට මල් දුන්නෑ එයා
බත් ඇට කෑ ලේන් බබා බොන්න වතුර සොයන්
පයිප්පෙ ළඟ ඉව කරනවා ටින් ටින් ටින් කියන්
අනේ හරිම පව් ඉන්නට බැරි තැන මට බලන්
කොප්පෙකට වතුර දුන්න ඇවිත් බොන්න කියන්
හිටියම දවසක විදුලිය කොටලා ආකහේ
හග් ගුඩු ගුඩු ගෙරෙව්වාට වැස්සක් කෝ කොහේ
කඳුළු වගේ දාඩිය බිඳු ඇවිදින් ගත වැහේ
රෑට නින්ද යන්නෙත් නෑ රස්නෙ හරිම මෙහේ
රේන් රේන් හනිකට ගෝ අවේ කියල ගයා
ඉස්සර මං කිව්ව සිංදු තරහද තව ඔයා
දැන්නම් ඇති ඔහොම හිටිය අමනාපයි කියා
සමාවෙලා ආයෙ එන්න අනේ අපව සොයා
ලිව්වේ විනීත පූ 2019-04-12
This comment has been removed by a blog administrator.
ReplyDelete