Wednesday, May 9, 2018

24. චූටී මගෙ දුව චූටී...

චූටී...චූටී...
චූටී මගෙ දුව චූටී...
ඔන්න අම්ම යන්න හදන්නේ
චූටි විහිළුවක් කරලා
චූටි තොත්තුවක් දීලා
අම්මට දුව යන්න කියන්න ...
බලන්න ඔය චූටි මුණ
හැන්දෑ නොවී එන්න කියන්න
අම්මට දුව යන්න කියන්න ..

චූටි කාලෙ මටත් චූටි කිව්වා මගේ අම්මා



ඒ කියන්නේ චූටිගෙ ලොකු අම්මා ..
හබුන් කවන වෙලාවේදී
විහාරමහ දේවී ගැන කියලා දේවී
මිරිස් සැරයි කියල ඔන්න
අහක බලා ගත්තෝතින්
ලොකු අම්මා ඒ කතාව කියල නොදේවී ...

චූටී...චූටී...
චූටී මගෙ දුව චූටී...

Thursday, May 3, 2018

23. මලක් වෙලා ඔබ පිපෙන්න..


මලක් වෙලා ඔබ පිපෙන්න - සොම්නසේ සුවඳ දෙන්න
ගඟක් වෙලා ඔබ ගලන්න - සෙනෙහසේ සිසිල දෙන්න

සඳක් වෙලා ඔබ නැගෙන්න - කළුවරේ එලිය දෙන්න
පවන් පොදක් වී හමන්න - සෝ සුසුම් ගිම් නිවන්න

කවක් වගේ මියුරු වෙන්න - නොමියෙනා රස මවන්න
දුකක් උනත් නොම සිතන්න - කාගෙ වත් හිත් තලන්න

වනස්පතිය සේ හිඳින්න - සිත් සතන් සනසවන්න
පහන් සිතින් මග බලන්න - කාට හෝ පිහිට වෙන්න

පුළුන් රොදක් සේම වෙන්න - නිදහසේ ඉගිල යන්න
සැහැල්ලුවෙන් දිවි ගෙවන්න - කා හටත් සතුට දෙන්න

කෝච්චියක් වගෙ දුවන්න - හිතුනොතින් යලි හැරෙන්න
ටිකක් වෙලා නතර වෙන්න - ජීවිතේ ගැන හිතන්න


22. කරල වැඩක් නෝටී..


හොර ගල් අර අහුල අහුල එනවා අපෙ චුටී
එන විදියෙන් පේන්නෙ නම් කරල වැඩක් නෝටී

අත් දෙක අර පිටිපස්සට කර බැඳගෙන ඇත
සැකයක් නැත මොකක් හරිම හංගාගෙන ඇත

නියපොතු ටික කෝ බලන්න පෙන්නනකො මට
නෑ නෑ නෑ මං බනින්නෙ නෑල්ලු ඇත්තට

මේ පේන්නෙ සුදට අපොයි නියපොතු වල හැටී
බිත්තිය හුරලා මේකි දෙන්න වටියි ගුටී

යසට තිබ්බ නියපොතු ඔක්කොම පතුරු ගිහින්
විසයි ඕව කී පාරක් කිව්වද මං ඉතින්

ආයි ඔහොම වැඩක් කරල අහුවුනොතින් මට
දෙන්නෙ දෙකක් ඉල්ලල මං කියල තාත්තට

තොල කණපිට ගහන් ඔහොම බැලුවම හරි තමයි
දන්නවානෙ හැටි අම්මගෙ තරහ ගියොත් වසයි

හරියන් නෑ බේරගන්න ඕන දෙකෙන් එකක්
මොකද කියමු බලන්න දැන් කලේ ඔහොම වැඩක්

ඩොලී නෑව පවුඩර් නෑ දාන්න මුණට
හිතේවි දුක ඩොලීට අනෙ හරි පවු එතකොට

මගෙ පවුඩර් එක ගන්නට බෑ තියලනෙ උඩින්
බිත්තිය හීරුවෙ පවුඩර් ගන්න තමයි ඉතින්

හ්ම් ඇත්ත තමයි මටත් තේරෙනවා තමා
අදට කමක් නෑ එහෙනං දෙන්නං මම සමා

යේ යේ හරි ෂෝයි අම්මෙ අර පවුඩර් එකත්
දෙන්නකො මං ආපහු දෙන්නං චුට්ටක් අරන්

චුට්ටක් බුරුලක් දුන්නම ගුලියක් බස්සන
පෙනේද පොඩි කමට අපිව අන්දන ලස්සන


Wednesday, May 2, 2018

21. දාල යන්න දුකයි..


සාංකාව හිතට දැනේ දාල යන්න දුකයි
නුඹට හොරෙන් මගෙ හිත මහ ගොඩාරියක් අඬයි
නුඹ නැතිතැන දවස මගේ දිගයි හරිම දිගයි
පොඩි මොහොතක් වුවද ගෙවෙන කල්පය වගෙ තමයි

දැවටී ළඟ සිනා පාන මගේ අහිංසකී
සුරතල් බස් කියයි මෙමට මෙතෙක් වෙලා නොකී
සෙනෙහස සිත නුඹට උපන් ඉතින් අනන්තෙකී
දන් නෑ විදියක් මට හිත හදා ගන්න හැකී

දොර ළඟ නුඹ ඇස් ලොකු කර බලන් ඉන්න කොට
යන්නෙ කොහොම මං මගෙ හිත කඩන් වැටෙන කොට
හිර කරගමි ඉකියක් පිට පනින්න එනකොට
බෑ ගින්දර නිවන්න හිත පිච්චේ එතකොට

යන්න මැණික යාලුවන්ට ඉතින් එකතු වෙවී
දෙන්න හාදු අරන් යන්න මට සුවඳක් වෙවී
දවස ගෙවෙයි මගෙ පැටියට අම්මා සිහි නොවී
ඉන්න රෝස මල මගෙ ලස්සනට හිනා වෙවී


20. නුඹ ...


නුඹ මුදු සුවඳින් පිරිච්ච - සීතල උදයක පිපිච්ච
හුරතල්කම පොදි ගැහිච්ච - මල් කැකුළක් නම්
ඒ සුවඳට වහ වැටිච්ච - සුරතලයට වසඟ වෙච්ච
නුඹ ගාවම නතර වෙච්ච - මඳ සුළඟක් මං

නුඹ සුදු පෙණකැටි එතිච්ච - හරි දඟකාරෙන් පිරිච්ච
උඩ පැන පැන හැඩ වැටිච්ච - දිය රැල්ලක් නම්
ඉවසිල්ලෙන් නතර වෙච්ච - නුඹ එනතෙක් මග රැඳිච්ච
ආදරයෙන් හිත පිරිච්ච - සුදු වැල්ලක් මං

නුඹ හරි පොඩියට පෙනිච්ච - නිවී නිවී ආපහු දිලිච්ච
කළුවර රැකදී නැගිච්ච - තරු කැටයක් නම්
ඒ එළියෙන් පණ ලැබිච්ච - ඇස් අහකට නොම ගෙනිච්ච
නුඹ ගාවම හිත රැඳිච්ච - නිල් අහසක් මං


සේපාලිකා මල් වෙත පැමිණි ඔබට බෙහෙවින්ම ස්තුතියි. ඉඩක් ඇත්නම් ඔබේ අදහස මෙහි තබා යන්නත් අමතක කරන්න එපා. මුහුණු පොතෙන් මගේ කවි පිටුව කියවන්න කැමති අයට ( මෙතැනින් ) පිවිසිය හැකියි.