සුදු නෙළුම් මලක සුවඳ දිගේ සිත පැටලෙනවා
මුදු සුවඳ දිදී නුඹෙ සුවඳට තව ලංවෙනවා
ඒ අතීතයේ සිතූ සිතුම් මට සිහිවෙනවා
ඒ අතීතයේ සිතූ සිතුම් අද සුව දෙනවා
සුදු නෙළුම් මලක් බෙල්ලන්විල බෝ සමිඳුන්ට
බැති සිතින් පුදා පැතුවේ මං නුඹ මගෙ වෙන්ට
නිදි ලොවේ සිනාසී සිහිනෙන් ආ දැකගන්ට
කිරි සුවඳ දැනේ දුන් එදවස මා සනසන්ට
හිස් අහස් ගැබේ පොඩි තරු කැට අතරින් පායා
සඳ කුමාරියක් විත් අහසට රහසක් කීවා
සඳ දියෙන් තෙමා සිත් අහසම සෙනෙහෙන් නාවා
පස් මහා බැලුම් නොබලා නුඹ මා වෙත ආවා
හෙමි හෙමින් මතක පොත පිටු පෙරලා බලන්නෙමී
සුන්දරම මතක මල් ගෙන යලි යලි සිම්බින්නෙමී
මල් සුවඳ පිරුණු සුසුමක් සතුටින් මුදන්නෙමී
මගෙ නෙළුම් මලයි නුඹ, ආදරයෙන් රකින්නෙමී
No comments:
Post a Comment